Guha Iminsi 15, umushikiranganji w'ubudandaji ko yoba yashinze ibiciro vy’ibidandazwa, ngo n’ukwiha amenyo y’abatwenzi kuko ikibazo kitari muri ubwo bushikiranganji
Kuri uyu wa gatanu itariki 27 Kigarama 2024, mu kiyago umukuru w’igihugu yari yatunganije cabereye kw'ishure Scheppers Nyakabiga mu gisagara ca Bujumbura, Evariste Ndayishimiye yahaye iminsi 15, umushikiranganji w'ubudandaji ko yoba yashinze ibiciro vy’ibidandazwa, ngo butabaye bwashinze ivyo biciro ngo buzoca bufutwa ngo ace avyikorere mu kibanza c’ubushikiranganji.
Munsiguro ziwe, yavuze ko kuvy'ukuri ngo hakenewe gushinga ibiciro, ngo kuko ibintu vy'uko uwuvyutse wese ashinga ibiciro ashaka, ngo bikwiye guhagarara ngo kuko birababaje. Kubwiwe, ngo ibintu bakura hanze ngo biba bizwi amahera bikwiye kugurwa, ngo umuntu abazi ati ngurisha aya ntarengwa. Ariko ngo kubera ata biciro ntarengwa abantu bigira ivyo bashaka bazinduka bashinga ibiciro uko bishakiye.
Nkuko yabandanije abisigurira abari bakoraniye muri ico kiyago, Umukuru w'Igihugu yavuze ko Umunsi umwe ngo yariko araja i Bugarama, ngo acasanga ikiro c'inyama kigurwa ibihumbi cumi n’abitanu 15.000, ngo hari uwasubiyeyo asanga badugije bagurisha ibihumbi cumi n’umunani 18.000, ngo amubajije aca avuga ngo idorari ryaduze. Akibaza nimba inka yororwa iduza igiciro ku munsi ku munsi uko biba vyagenze? Akabona ko ari benivyo vyatumye n'abagwizatunga bakora uko bashaka, ngo aba barangura hanze bashinga ibiciro bashaka.
Nkuko yama abigenza mugushinga amategeko adakwirikizwa aherera mu majambo, umukuru w’igihugu yaciye atangaza ikiringo c’iminsi 15, ko umushikiranganji w'ubudandaji yoba yashinze ibiciro vy’ibidandazwa. Akaba yakoresheje aya majambo ati : nduguruye twa mugina « Ndabahaye iminsi 15 turabe ko mubikora mubiheze, mushobore gushinga programme y'ibiciro. Mubishoboye muzombwire mu minsi 10 gusa muti twahejeje ». ndugaye twamugina.
Umukuru w’igihugu ntiyagarukirije ngaho, yamenyesheje ko mugihe ico kiringo c’iminsi 15 ubwo bushikiranganji bwoba butarashinga ivyo biciro, ngo buzoca bufutwa ngo ace avyikorera mu kibanza c’ubushikiranganji.
Bamwe mubakwirikirana ingingo n’majambo bikunda gushikirizwa n’umukuru w’igihugu, bamenyesha ko, ivyo yaraye avuze ngo ari ukwiha amenyo y’abatwenzi, ngo kuko ikibazo c’iduga ry’ibiciro ku musi ku musi kitari mu bushikiranganji bw’ubudandaji.
Ngaha abatari bake bakaba bafatira kuvyo yigeze kuvuga ko yifatiye mu minwe ibintu vyose vyankenerwa, nkigitoro, isukari, ibinyobwa n’ibindi. Yamara ngo kuva umusi abishikiriza, ngwivyo bintu vyarayangaye ntakintu nakimwe c’igeze gikorwa. Sivyo gusa abo babivuga bamenyesha ko n’ibisanzwe bizwi ibiciro vyayo, nk’ibiciro vy’isima ya BUCECO, ibiciro vy’isukare, ibiciro vy’ibinyobwa vya BRARUDI, ngo ntikibuza ko ivyo biciro bab irengako. Bakavuga ko igihe cose hazoba hakiri ikibazo c'amafaranga mvamakungu, ngo ntanyishu y’ibiciro izokwigera iboneka.
Inkuru yanditswe na Don de Dieu MBAZUMUTIMA.