Iryavuzwe ryaraye ritashe, bamwe mubari bisigiye gutaha ubukwe baraye bahawe gasopo. Abo ni bamwe mubari bamaze iminsi baduga bamanuka ngo bariko baritegurira kuja mu matora y’imirije baraye babujijwe n’umurwi CENI
Mugihe muri uyu mwaka hategekanijwe amatora y’abajenama bamakomine hamwe n’ayabashingamateka, imirwi itandukanye y’abarundi yari yagumye yiyamiriza ayo matora imenyesha ko atamatora meza ashoboka mu Burundi kuko CNDD-FDD idashaka ko haba amatora meza. Ariko rero hari n’abandi Barundi bari bagumanye ibizigizigi ko kumbure ibintu bishobora guhinduka CNDD-FDD ikemera ko haba amatora meza.
Aha mwomenya ko hari n’abagerageje kuja hamwe mu kugira urunani bahurikiramwo mu ntumbero yo kurondera guhangana na CNDD -FDD. Ngaha twovuga Urunani Burundi Bwa bose, ruhurikiyemwo imigambwe ya Sahwanya FRODEBU, CODEBU, CNDD na FEDS-Sangira. Eka hari n’iyindi migambwe yariko iragerageza kwitegura kuja muri ayo matora.
Ariko rero kuri uyu wa 31 Kigarama 2024, Umugwi CENI warasize ahabona urutonde rw’imigambwe yemerewe kubandanya amatora. Kuri urwo rutonde, CENI yarafuse burundu intonde zose z'Urunani Burundi Bwa bose mumatora yose ategekanywa kubera rimwe kw'igenekerezo rya 5 Ruheshi 2025. yaba ayabajenama bamakomine canke ayabashingamateka, ikaba yitwaje ko harimwo Agathon Rwasa n'abandi bashingamateka bafatwa nk'abanywanyi ba CNL.
Mu nsiguro umugwi CENI wabandanije utanga, uvuga ko mu kwanka izo ntonde z'urunani Burundi Bwa bose, ngo nikubera abo bashingamateka bashizwe ku ntonde basanzwe bari mu nama nshingamateka baserukira umugambwe CNL ngo mugihe umugambwe CNL utari muri urwo runani. Umugwi CENI ukavuga ko ingingo y'112 y'ibwirizwa rigenga amatora hamwe n'ingingo y'7 y'ibwirizwa rigenga imigambwe zahonyanzwe.
Bamwe mubanyagihugu muri kino gihe bakaba batanguye kuvuga ko batumva igituma hategurwa amatora kandi u udashaka guhiganwa n’abandi bikabasiga. Kubwabo bati ko bimaze kugaragara ko CNDD-FDD idashaka amatora, ntishake uwo bahiganwa bati nibagume batwara basi bareke gubatesha umwanya bababwira amatora kandi ivyo abanyagihugu batoye bidaheza ngo bikwirikizwe.
Mugihe bamwe murabo bankiwe kwitoza bamaze gushikana ibirego vyabo muri Sentare ijejwe kwubahiriza ibwirizwa shingiro basaba ko yobarenganura, abanyagihugu batandukanye babona ko abo bariko bratwara ibirego vyabo ari nko gutakaza umwanya wabo, ngo kuko gukomorwa n’inzoka ugaheza ukwitwara kw’isato ngo uba wataye umutwe. Bakamenyesha ko ivyabaye mu mwaka wa 2020, vyabituye iyo Sentare ngo vyari bikwiye kubabera akarorero ngo bakamenya ko atanakimwe ubutungane buzohindura kungin go ya CENI ngo kuko CENI itangaza ivyakorewe mu mugambwe CNDD-FDD.
Kubwabo babivuga, babona ko inyishu yoba imwe gusa, yuko abanyagihugu bafatana munda bakarwanira uburenganzira bwabo, biciye mugoresha uburyo bwose bushoboka.
Inkuru yanditswe na Aline Munezero.