Naho Umuvugizi w' igisirikare c' Uburundi ararahira akarengwa ko uburundi butakuwe ku rutonde rw' ibihugu vyagiye kugarukana amahoro n'umutekano mu gihugu ca Somaliya, ayo makuru ashobora kuba ariyo kandi ngo bizogira ingaruka mbi kuburundi
Inyuma yaho hamenyekaniye ko uburundi bwakuwe muri rwa rwego rw’abasirikare bajejwe kugarukana amahoro muri Somaliya kuva mu kwezi kwambere uyu mwaka wa 2025, nkuko biherutse gutangazwa n’akanama k'amahoro n'umutekano mu muryango w'ubumwe bwa Afrika, Umuvugizi w' igisirikare c' Uburundi Gaspard Baratuza wewe ararahira akarengwa ko uburundi butakuwe ku rutonde rw' ibihugu vyagiye kugarukana amahoro n'umutekano mu gihugu ca Somaliya, akemeza ko ahubwo uburundi nako kanama k'amahoro n'umutekano batahurije ku bitigiri vy' abasirikare boja gukora ico gikorwa.
Nkuko bisigurwa nuwo avugira igisirikare c' Uburundi, amenyesha ko baravye abasirikare bakenewe kandi basabwe na Somalia n' amabanga bazoba bagiye kurangura, ngo basanga kwoba ari nko gushora ingabo z' Uburundi ku mwansi ngo kuko ico gihugu bakizi ndetse bazi n' umwansi bahanganye uwariwe. Gaspard Baratuza akavuga kandi ko barindiriye inyishu ibemerera canke ibankira kubijanye n' igisabo basavye co kubemerera gukoresha abasirikare ibihumbi bitatu. Nayo mugihe bitokunda ingabo z' Uburundi ngo zizoca zikurwa muri ico gihugu mu kiringo c' amezi atatu.
Kubwa Diomède Ninteretse, umuhinga mu bijanye n'ubutunzi, amenyesha ko ingingo yo gukura igisirikare c'Uburundi mu gihugu ca Somariya ifise ingaruka mbi ku bijanye n'ivy'ubutunzi, ivy'imigenderanire, ivya poritike hamwe n'ivy'umutekano. Akemeza ko ico gihugu cafasha Uburundi kuronka amahera mvamakungu, narirya akenye muri kino gihe mu Burundi.
Ikindi Diomède Ninteretse, umuhinga mu bijanye n'ubutunzi yashikirije, ngo ni uko abo basirikare barenga igihumbi (1000) baramutse bagarukanwa mu gihugu, ngo bishobora guteza icuka kibi ngo mugihe Reta yoba itateguye neza kubakira, ngo kandi bahora baronswa uturusho dutandukanye nko guhembwa amahera menshi, kwungura ubumenyi n'ibindi.
Sivyo gusa, uwo muhinga abandanya amenyesha ko Uburundi buzotakaza amahirwe mu makungu, kuko imigenderanire n'ibindi bihugu izosubira inyuma nko mukutaja mu manama y'akarere kandi ngo bishobora gutuma ibitero vy'abihevyi vyiyongera kuko bazobona ko ibihugu vyo mu karere vyananiwe gutuza abo bihevyi.
Ariko naho biruko, hari nabavuga ko abo basirikare ngo bateye ikigongwe kubona igihugu kigeze aho kigeze nabo ukamenga siho bari. Bakavuga ko nimba abasirikare badashoboye gusubiza ibintu mu buryo mu Burundi, ngo bazokwama bakoreshwa mu kurungikwa kubonera ayinkware yaboneye kumugezi mu gihugu ca Congo nkuko birirwa barayabonerayo.
Inkuru yanditswe na Jeannette Kamikazi.