Abagirizwa gutembagaza ubutegetsi mu 2015, ngo ntibazokwigera bagirirwa imbabazi, nkuko bivurwa na Reverien Ndikuriyo
Mugihe umugambwe CNDD-FDD uvuga ko washize imbere Imana, ukavuga ko wahaye ikibanza cambere Imana, mugihe umumenyeshamakuru yabaza umunyamabanga mukuru w’umugambwe CNDD-FDD ko batokura ivyo vyivugo mu majambo bakabashira mu bikorwa mukugirirra ikigongwe abarundi Abagirizwa gutembagaza ubutegetsi mu 2015, Reverien Ndikuriyo yavuzeko batazokwigera bagirirwa imbabazi.
Ivyo umunyamabanga mukuru w'uwo mugambwe, ahejeje kubishikiriza mu kiganiro yahaye abamenyeshamakuru, hariya mu ntara ya Makamba, kuri uyu wa 3 Nzero 2024, aho yariko arishura ku bibazo vyerekeye ubuzima bw'igihugu. Nayo kuvyerekeye abahoze mu mugambwe CNDD-FDD nabonyene bahunze igihugu kubera ivyabaye mu 2015, naho hari bamwe mu bicocoro basanzwe bazwi ko bahunze bari muri CNDD-FDD, umunyamabanga mukuru, ararahira akarengwa ko atamu CNDD-FDD n’umwe yigeze ahunga akavuga ko azobaza nimba yoba ariho.
Nyamara naho avuga gutyo, ntamurundi atazi ko Leonidas Hatungimana yari muri CNDD-FDD mère akaba yari n’umuvugizi w’umukuru w’igihugu, Onesime Nduwimana yari umuvugizi wuwo mugambwe, Pie Ntavyohanyuma yari umukuru w’inama Nshingamateka n’abandi. Imvugo rero ya Reverien Ndikuriyo umunyamabanga mukuru wa CNDD-FDD, ikaba ifatwa nkakamenyere kabategetsi bose bava muri CNDD-FDD kuko nabandi bama bakoresha ibinyoma mu majambo bashikiriza.
Kubwiwe rero, avuga ko Reta y’Uburundi ititeguriye guha ikigongwe abahunze bagirizwa gutembagaza ubutegetsi mu mwaka wa 2015, agasigura ko n’Imana abo yaremye bayishavuje hari igihe ibahana. Akavuga ko aba nyepolitique bahunze bafise ico bagirizwa bategerezwa guhanwa hisunzwe amategeko. Ngo ahubwo abo bagirizwa gutembagaza ubutegetsi ngo nibanyaruke kuko bahanwe ngo kuko nimba barindiriye ikigongwe kitazoza vuba.
Bamwe mubamukwirikiranye, bakaba bariko baravuga ko umunyamabanga mukuru ngo yarakwiye gushira amaguru hasi, ngo kuko hari nabandi bari bakomeye kumurusha yamara ngo bamaze kugira ivyago. Aho ni mugihe n’ikiringo ciwe co kurongora umugambwe caheze, akaba ashobora no gukurwa murayo amabanga umwanya uwariwo wose.
Inkuru yanditswe na Don de Dieu MBAZUMUTIMA.