Abakuru b'ibihugu vya EAC baraye basavye Repubulika Iharanira intwaro Rusangi ya GCongo kuganira n’imigwi irwana harimwo n’umuhari M23
Mu nama igira 24 y'abakuru b'ibihugu vy’umuryango w’ibihugu vy'ishirahamwe ry'ibihugu vya Afrika y'Ubuseruko EAC, yaraye ibaye hifashishijwe ubuhinga bwa none kuri uyu wa 29 Nzero 2025, abakuru b'ibihugu vya Kenya, Uburundi, Urwanda, Ubuganda, Tanzaniya, Somaliya na Sudani y'epfo bari bayitavye basavye Repubulika Iharanira intwaro Rusangi ya GCongo kuganira n’imigwi irwana harimwo n’umuhari M23.
Nkuko biboneka mw'itangazo risozera iyo nama idasanzwe, abo bakuru b'ibihugu bamenya ko babazwa n'ubuzima bw'abantu buriko buratakarira mu buseruko bwa Congo, na cane cane abana n'abakenyezi. Sivyo gusa, bavuga ko kandi batewe umutima uhagaze n'abari mu myiyerekano i Kinshasa batera inyubakwa z'ubuserukizi bw'ibihugu vyamahanga. Aha, abo bakuru b'ibihugu bagahamagarira Reta ya Congo gukingira nyabuna abo baserukira ibihugu n'ivyabo.
Abo barongoye ibihugu vy'akarere ka Afrika y'Ubuseruko barasaba kandi Reta ya Congo guca mu nzira y'amahoro kugira izo ntambara zihagarare. Ngaha bakavuga ko bategerezwa kuba ibiganiro bihuza imigwi irwana harimwo n’umuhari M23. Kubwabo impande zose zisabwa guhagarika intambara ata gisabwe kugira habe ibikorwa vy'ubutabazi ku banyagihugu bariko barakorwako n'izo ntureka. Bagiriyeko bemeranya ko bagiye gukorana inama na bagenzi babo b'ibihugu vy'akarere ka SADC.
Tubibutseko Umukuru w'igihugu ca Repubulika Iharanira Intwaro Rusangi ya Congo Félix Tshisekedi atitavye iyo nama y'abakuru b'ibihugu vy’umuryango w’ibihugu vy'ishirahamwe ry'ibihugu vya Afrika y'Ubuseruko EAC.
Mwomenyako naho Antoine Félix Tshisekedi, atashoboye kwitaba inama yiga kubibazo vy’intambara biri mugihugu ciwe, ntivyamubujije gushikiriza ijambo kubakongomani. Muri iryo jambo, yashikirije abanyagihugu mw'ijoro ryo kuri uyu wa gatatu itariki 29 nzero 2025, akaba yamenyesheje ko Repubulika Iharanira Intwaro Rusangi ya Congo izorengana ico ivyo bibazo barimwo. Nyamara kandi akaba yanatangaje ko hagiye kuba ibitero vy'inguvu vyo kwihaniza umuhari M23 n'igisirikare c'Urwanda. Muvyo yatangaje akaba yamenyesheje ko izo ntambara ngo zishobora kurandagata mu karere kose k'ibiyaga binini.
Inkuru yanditswe na Don de Dieu MBAZUMUTIMA.