Umukuru w’igihugu c’uburundi yoba afise ubwoba ko Abasirikare yashoye mu ntambara mu gihugu ca Congo bashobora kumuhindukirira inyuma yo kugirirayo ibibazo n’ingorane ?
Ari mu birori vyo kwipfuriza umwaka mushasha abaserukira ibihugu vyabo mu Burundi, kumuhingamo wo kuri uyu wa gatanu igenekerezo rya 31 nzero 2025, kumurwa mukuru w’ubutunzi i Bujumbura kukirimba i Kiriri, umukuru w’igihugu c’uburundi n’ubwoba bwinshi yaraye abamenyesheje ko intambara iri mu gihugu ca Congo, ko ishobora kuba intambara yo mu karere kagize umuryango mpuzamakungu.
Abanje kwirengangiza uruhara yagize mukurungika abasirikare buburundi mu gihugu ca Congo kandi bakagirirayo ingorane, Evariste Ndayishimiye, yasavye abagize uwo muryango guhagarika iyo ntambara ngo kuko ishobora kuba ikibazo gikomeye, akaba yasavye kandi amakungu gukwirikirana neza ikibazo ico gihugu ca Congo irimwo mbere agasabako hoba ibiganiro kuko ingwano itigeze itora umuti.
Ivyo vyose nkuko akunda kubivuga, nejo yasubiye kubisuka kugihugu c’urwanda mugusaba abo abo baserukira ibihugu vyabo mu muburundi kugondoza urwanda ngo kugira ruhagarike iyo ntambara muri Kongo ngo kuko bitagenze uko iyo ntambara ishobora gufata akarere kose. Evariste kaba yemeje ko uburundi ngo butazokwigera na rimwe bwemera ko ubwigenge bw’ibihugu vyo mu karere buvogerwa kandi inzu y’umubanyi ngo ihiye narwawe iba yegereje.
Yamara naho umukuru w’igihugu c’uburundi, atanguye kuvugana ubwoba burenze,wawundi ati intabwirwa ibwirwa nuko amaso atukuye, kandi bati agasozi ntibarirwa kahiye abagabo babona, kuva Evariste Ndayishimiye ahitamwo kuja kwifatanya n’igihugu ca Congo, abarundi n’amakungu ntaco batari bagize mu gusemerera bahanura ko ivyo bintu agiyemwo bizozanira akarambaraye uburundi. Nubundi natikebuka ngo aboneko inzira y’ibiganiro ariyo yonyene ikwiye gukoreshwa mugukemura ibibazo bitandukanye azoruhuka akweze ingorane.
Inkuru yanditswe na Don de Dieu MBAZUMUTIMA.