Hari umurundi yatanze ubutumwa ku barundi, imbere yo guhimbaza imyaka 34 abarundi bemeje amasezerano y'ubumwe bwabarundi
Tugire Amahoro!
Igenekerezo rya 05 Ruhuhuma 1991, niho hatorwa amasezerano y'ubumwe bw'abarundi. Ni ukuvuga ko muri iyi ndwi abarundi tuzohimbaza imyaka 34 ayo masezeranyo atowe. None vy'ukuri hariho ubumwe bwabarundi hagati yacu abarundi?
Murundi mwenewacu, woba uriko uritegereza mu kibano, mu nzego canke iyo turiko turahimbaza ubumwe bw'abarundi igenekerezo rya 5 Ruhuhuma wokwibaza ko abarundi twunze ubumwe. Mugabo kandi usubiye akaraba abantu bicwa uca ubona ko ata bumwe bw'ukuri buhari.
Ehe raba namwe, kuva mu mwaka wa 1991 abantu bishwe bazira uko baremwe, abishwe bazira imigambwe barimwo, abishwe kandi bazira ivyiyumviro vyabo n’ibindi ntibagira uko bangana. Aha turiko tuvuga imiriyoni zabarundi bagandaguwe bunyamaswa muriyi myaka 34 iheze.
Raba namwe abantu uno munsi bariko baricwa n'inzara, abana birirwa baraheba amashure kubera ubukene, abantu baricwa n'ingwara kubera ata buryo bafise bwo kwivuza n’ibindi. Sinivyo gusa, n’ibi bintu usanga hariho bamwe bakenye n'abandi batunze n'ikindi kimenyetso cerekana ko ata bumwe buri mu barundi.
Muti none biva kuki? nashaka turabire hamwe intambamyi zatumye habura ubumwe bwabarundi. Hari bamwe bavuga ko intambamyi ya mbere y'ubumwe ari ikinyoma. Reka twihereko, twisuzume mbega wewe murundi ahuri hose woba uvuga ukuri iyo hageze kuraba ingorane zifatiye ku moko, intara, amadini? Ubwo wewe uvuga ukuri iyo uriko uravuga igituma igihugu cacu kiri mu bibazo? Tugiye ku mbuga ngurukanabumenyi za (Space) birumvikana neza ko abatari bake mubakoresha izombuga turi ababeshi.
Ububeshi n'ikintu kibi cane kiri mu bintu bikomeye bituma ata bumwe burangwa mu gihugu, mu miryango yacu arico gituma birya tuvuga kumunwa gusa ko umurundi wese yarakwiye kurangwa no kuvuga ukuri kuvuye ku mutima ari umushinge, intango yo kwubaka igihugu kirimwo ubumwe. Nashaka rero turabe ko muvyo tuvuga buri musi, muvyo dukora buri musi dukwiye kwama dushira ukuri imbere. Kandi tukavuga Ukuri kuvuye ku mutima.
Barundi mwese ni muze turwanire Ukuri turwanye ikinyoma kuko nico cishe uburundi.