Umusi mukuru w'abakundana witiriwe umweranda Valantino « Saint Valentin » muri kino gihe wahindutse umusi wubusambanyi no kurenga kuri benshi
Uko umwaka utashe igenekerezo rya 14 Ruhuhuma hama hahimbazwa umunsi w’abakundana witiriwe umweranda Valantino « Saint Valentin ». Naho mu myaka yaheze, uwo munsi wangwa n’uko abakundana bibuka urukundo rwabo mu gusangira, bagasohokana bongera bahana utuganuke muburyo butandukanye cane cane harimwo n’amashurwe, muri kino gihe uwo musi wahindutse umusi wubusambanyi no kurenga ibigo kuri benshi.
Tubanze tubibutse ko umusi mukuru w'abakundana witiriwe umweranda Valantino « Saint Valentin », wakomotse ku mupadiri yitwa Valentin yabayeho mu gihe c’umwami w’abami Claudius II mu myaka ya 269 na 273 imbere y’ivuka rya Yezu kiristu. Muri ico gihe, tariki ya 14 Ruhuhuma hama haba umunsi mukuru wo guhimbaza umunsi w’umwamikazi Juno wafatwa nk’imana y’abagore.
Uwo munsi, abasore barahurira ahantu bakandika amazina y’abakobwa bari mu kigero cabo bakayashira mu kintu, bagaheza bakagira ibintu bimeze nkatombora. Umusore yatomboza izina ry’umukobwa uwo musi yaca amuherekeza bakagenda guhimbaza uwo munsi bari kumwe. Mumakuru twarondeye ngo ni uko ivyo vyatuma abakobwa bahura n’abasore mugihe vyari bisanzwe bitemewe ko abakobwa bahura n’abahungu. Ariko uwo musi wowo barahura muriyo ntumbero yo gusohokana, hanyuma bagasangira bikavamwo n’ubucuti bwashobora no gukomera bukavamwo no kuzoshinga izabo bakabana nkumugabo n’umugore.
Ku ngoma ya Claudius igihugu ciwe carugarijwe n’intambara zikomeye, agira ikibazo c’abasirikare baja kurwanira igihugu kubera ko abagabo bakiri bato batemera gusiga abagore babo ngo baje ku rugamba. Umwami Claudius ahava afata ingingo yo guhagarika ivyo kubakana (kubana nkumugabo n’umugore), ariko umweranda Valentino ntiyavyemera. Afatanije n’Umweranda Marius baciye batangura gusezeranya abantu bashaka kubana mw’ibanga, ariko amakuru ahava ashikira umwami Claudius biramubabaza cane acashiraho itegeko ryo gufata Padiri Valentino arapfungwa.
Padiri Valentin yarapfunzwe, akatirwa urwo gupfa akubiswe amahiri akanacibwa umutwe. Ari mu munyororo arindiriye ko igihe kigera akicwa, abantu bamukunda ngo baguma bamuzanira amashurwe hamwe n’ubutumwa bwo kumukomeza bakabicisha mw’idirishya ryaho yarapfungiwe.
Uyu musi ikibabaje uwo musi wahindutse umusi wubusambanyi kuri benshi, niwo musi abitwa ko bakundana bashurashura, niwo musi abakenyezi canke abagabo barenga ibigo barondera gushimisha abo bita abakunzi babo. Sivyo gusa, uyu musi niho abigeme benshi batakaza ubukumi bwabo (Ubusugi), uyu musi niho bamwe mu bigeme batwara inda zidategekenajei bakazozongerako gukora ivyaha vyo kwica mu kuzikorora. Aha ntidusize inyuma abarara batandukanijwe nuyu musi biturutse kuvyo baza gukora inyuma yivyo bakoze bagaca bashwana bikabaviramwo gutandukana.
None kubisanzwe Urukundo niki ? kwoba ari uko gushurashura, gusambana, kurenga ibigo no gukororora amada ? Urukundo ni impano Imana yaduhaye kugirango twishime. Ariko yaraduhaye n’amategeko ntarengwa tugomba kugenderaho, kubera ko ariyo yaturemye. Ariko ikinbabaje nukubona uyu musi bakora ivyo Imana itubuza binuka imbere y’Imana. Ngaha uburorero n’ibwinshi, hari abantu babesha ko bakundana ariko ugasanga ivyo bita urukundo nugusambana, gushurashura no kurenga ibigo. Ingo zabubatse babanye neza muri kino gihe zisigaye ari imparurwa, kubera abenshi muribo nibo birirwa baracana inyuma, bigatuma batandukana (divorce). Mu bihugu vyinshi, gutandukana kwabubatse bisigaye birenga 70%. Ngivyo rero ibisigaye vyitwa Urukundo. Nico gituma abantu benshi bikwegera imivumo n’imikoshi bibashikana kukubura ubumuntu Imana yari yarabashizemwo, no gutakaza imigisha yabo.
Tubibutse ko naho biri uko, mu burundi hirya no hino bamenyesha ko uwo musi ugoye guhimbaza ngo kubera ibiciro vy'ibintu vyose vyankenerwa harimwo nivyibifungurwa ngo vyaduze kurugero ruteye ubwoba ngo kandi basanzwe bibereye mu bukene buteye ubwoba.
Inkuru yanditswe na Don de Dieu MBAZUMUTIMA.