Abanyagihugu baraye basubiye gukorwa mu nkovu n’umushikiranganji w’uburimyi, ko kubona imvura itariko irarwa, ari Imana y’umvise amasengesho y'abarundi
Sibwo bwambere, eka si n’ubwakabiri abategetsi b’uburundi bavuga amajambo ababaza, acumita, akora munkovu abarundi, kubibazo bidasanzwe biba bibugarije. N’umushikiranganji Prosper Dodiko, muvyo ajejwe harimwo uburimyi n'ubworozi, ivyo yaraye ashikirije vyaraye bivunye umutima abarundi mugihe batabona ingene bagiye kubaho bivuye kumvura itariko irarwa kugira ngo ibiterwa bishobore kwera.
Ari mu ngoro y’amakoraniro mu Kigobe, kugira ngo yishure kubibazo bihanze uburimyi Abashingamateka, kuri uyu wa 27 Ruhuhuma 2025, uwo mushikiranganji w'uburimyi n'ubworozi, yavuze ko ibikoresha vy’ibanze mu guhingura ifumbire biva hanze kandi bigurwa n’amafaranga mvamakungu, ayo nayo ngo mu burundi akaba akenye. Kubwiwe ngo mu gutorera umuti ico kibazo, ngo ni uko buri murundi yoshira inguvu mu bisata bizana amafaranga y’agaciro.
Umushikiranganji Prosper Dodiko, yavuze kandi ko ivyo bibazo bizotorerwa umuti ngo kuko igisata co kugwiza amafaranga mvamakungu kiriko kiraryohorwa. Akaba yatanze akarorero, ko ubu abantu 4 batandukanye ngo aribo bafise urufunguruzo rwugurura icumba c’ahabikwa ubutare. Ngo badakoranye ntihashobora kwugururwa mu ntumbero zo gukingira ubwo butare kugira ngo umwimbu wabwo uzane umusaruro, ntusubire kuba 0%.
Ariko abarundi baraye bakubiswe n’inkuba, mu kumva umushikiranganji Prosper Dodiko, amenyesha ko Imana ngo y’umvise amasengesho y'abarundi kw'ibura ry'ifumbire, ngo iraheza ica iba irahagaritse imvura ngo kugira ifumbire ibanze iboneke. Ivyo vyaje biba nkinkuru yincamugongo kubarundi, mugihe batabona ingene bagiye kubaho bivuye kumvura itariko irarwa kugira ngo ibiterwa bishobore kwera.
Ivyo yaraye ashikirije, bikaba bije vyibutsa imvugo zitandukanye zimaze gushikirizwa n’abategetsi kuva intwaro ya CNDD-FDD ishika kubutegetsi. Bamwe rero mu banyagihugu ntibatinya kuvuga ko iyi ntwaro ibageze ahantu, ko bipfuza icoyibakurako.
Inkuru yanditswe na Don de Dieu MBAZUMUTIMA.