Umugambwe PPD-Girijambo, uriyamiriza irungikwa ry’abasoda b’uburundi muri Kongo, bagasaba ko abo basirikare bovanwayo vuba bwango
Nkuko tubisoma mw’itangazo rijeje gusoka ku muhingamo wo kuri uyu musi wagatanu, mu mugambwe PPD-Girijambo bavuga ko kuva leta y’Uburundi irongowe na Evariste Ndayishimiye, ngo ifashe ingingo ihambaye yo kurungika ingabo z'Uburundi kurwana mu gihugu ca Repubulika iharanira intwaro rusangi ya Kongo, abatari bake mu barundi no mu banyamahanga ngo barayineguye kuko vyagaragaye ko ishobora kugira ingaruka mbi mu karere no ku gihugu cacu.
Muri iryo tangazo ryateweko umukono na Leonidas Hatungimana, asanzwe ariwe aramutswa uwo mugambwe, bamenyesha ko, Uburundi mu karere burimwo bwashobora kuhavana ijunja n’ijambo iyo buza kuba Umuhuza w’abashamiranye aho kuja ku ruhande rumwe mu mpande zibiri zifitaniye amatati. Kandi nkako ngo uwuja kwuzuriza abavukanyi arararama canke ararangamiza.
Nkuko babandanya babimenyesha, ngo ivyo ntivyashobotse, ngo kuko atawutanga ico adafise. Kukaba nkako, ngo Leta y’Uburundi ubwayo vyarayinaniye kwegeranya beneburundi biciye mu biganiro, kugira ngo itahukane mu gihugu cabavyaye abatavuga rumwe nayo, abatari bake bakaba ari impunzi hirya no hino, bamwe ndetse bakaba barahisemwo inzira y’ugufata ibirwanisho kugira ngo bumvikanishe ibibazo vyabo.
PPD-Girijambo, ikabonako ukwo guhitamwo kuja mu ntambara mu karere kw’abaramutswa igihugu c’uburundi uyu musi, ngo aho guhuza abafitaniye amatati, ngo vyaje vyirengagiza utwigoro twinshi tw’amashirahamwe mpuzamakungu nka EAC, SADC na UA kugira ngo abashamiranye basubize inkota mu rwubati.
Kubwa PPD-Girijambo, ngo ivyo ku gihugu c’uburundi ngo vyaragiz'ingaruka mbi nyinshi, ngo kandi n’ubu bikiriko. Zimwe muri zo ngaruka ngo akaba ari nk’izi:
- Abasirikare benshi b'Uburundi bapfira muriyo ntambara ibitigiri vyabo naho bigoye kumenya neza, kandi igihugu cashobora kuvyirinda ;
- Abenshi muri abo basirikare, ngo bakaba badahambanwa iteka mbere n’imiryango yabo ntimenyeshwe neza ivy’ababo ;
- Kuja mu ngwano hanze, ndetse no kuyicura ku butaka bw’Uburundi, ngo kandi bijana n’imvugo mbi iteye ubwoba y'amacakubiri izanana mu kugabisha Abarundi ngo bitegurire intambara batasomborokeje, bigatuma mu mitima ya benshi mu barundi hagaruka ukwinubana hagati y'amoko kandi abarundi basanzwe bazi aho vyagejeje igihugu cacu.
Umugambwe PPD-Girijambo, bakaba bamenyesha ko kubera ivyo vyose, basavye bashimitse ibi bikurikira:
1) Kuri leta ikaba isabwa ibi bikurikira :
- Ngo itegerezwa kuvavanura n’inzira yo gufasha gutorera inyishu ibibazo vy’akarere biciye mu ngimba, ahubwo Uburundi bukiyambika umutamana mu gufatanya n’akarere n’amakungu kugarukana mu karere amahoro biciye mu biganiro ;
- Gutunganya ingene abasirikare b’Uburundi n’abanyagihugu babaherekeje bava vuba muri Kongo kandi mu mutekano, maze aho guhora imitima iri mu mitwe, Leta ngo igatanguza ibiganiro hagati ya beneburundi kugira ngo ejo no mu Burundi ntihaze harwe ibara kubera ko bamwe mu barundi babona ko bakumiriwe bagahezwa mu buhungiro ;
- Kuvugurura umubano mwiza n’ababanyi biciye mu kuganira no kwubahana, gutyo ntibicure Uburundi nabwo ntibubicure ;
- Gushigikira no kwisunga ingingo ziherutse kwemezwa mu nama ya SADC na EAC, ikaba ari nzira irashe yerekeza ku mahoro mazima mu gihugu kibanyi ca Kongo no mu karere
2) Abarundi nabo basabwa ibi bikurikira :
- Kuguma bafatanye mu nda no kwiyamiriza ingendo n'imvugo y'amacakubiri iriko irak'indaro mu gihugu cacu aho yoza iturutse hose ;
- Kwiyamiriza no kudoma urutoke kuri abo bose bafise imvugo zibiba urwanko n’amacakubiri mutarabiriye ubwoko b’umurwi zizananyemwo. Mwese, twese turi bene Burundi kandi tugomba kubana mu mahoro ;
Bikaba vyagiriwe i Buruseli mu Bubiligi Kuri uyu wa gatanu itariki 07 Ntwarante 2025, Hatungimana Léonidas, Umukuru w’umugambwe PPD-Girijambo, akaba ariwe yabiteyeko umukono.
Inkuru yanditswe na Don de Dieu MBAZUMUTIMA.