Evariste Ndayishimiye yumvikanye yagiriza igihugu c’u Rwanda, kwarico ntandaro yamagorwa abarundi bagiye baracamwo kuva mu 1959
Wotana n’umwana atagutuka akaguturira. Uyo ni umwe mu migani iriko iravurwa inyuma yaho umukuru w’igihugu c’uburundi Evariste Ndayishimiye yumvikanye avuga amajambo arimwo kubiba urwanko rwamacakubiri y’amoko ku gihugu c’u Rwanda, mu gihe hari hamaze iminsi havurwa ibiganiro bigamije gukemura ibibazo bimaze imyaka biri hagati yivyo bihugu.
Evariste Ndayishimiye, ntagihe cari kihaciye amenyesheje abarundi n’amakungu ko yiteguriye kurwana n'igihugu kibanyi c'Urwanda. Hakaba hari ivyo yavugiye mu ntara ya Kirundo muri komine Bugabira kuri ku wa 11 Ruhuhuma 2025 aho yamenyesheje ko amaze kugabisha Urwanda ko rutazomunesha. Ariko ivyo yashikirije, inyuma yakanya gatoya, yarabihinduye avuga ko yaganiriye n’ibihugu bigenzi vy’u Rwanda, ngo bimubwira ko yotekana ko amakuru afise ko urwanda ruzotera uburundi atariyo.
Mu nama yamuhuje n’abaserukira ibihugu vyabo, umukuru w’igihugu c’uburundi, yababwiye ko yahisemwo inzira yo gusubira guhurira mu biganiro nkuko bari barabitanguye agishikira ubutegetsi mu mwaka w’2020, ngo bikaba arivyo vyomushikana ku mahoro arama yo kubana neza hagati y’uburundi n’u Rwanda. Ivyo Ndayishimiye akaba ngo azoba abikoze mu ntumbero yo kwirinda intambara hagati y’ibihugu vyose.
Umushikiranganji ajejwe imigenderanire y’igihugu c’u Rwanda n’ayandi makungu, Olivier Nduhungirehe, mundwi iheze yari yashimangiye iyo mvugo ya Evariste Ndayishimiye, mu gutangaza ko abategetsi b’u Rwanda n’abo mu Burundi bariko barabandanya ibiganiro, akaba yavuze ko ivyo biganiro arivyo bizohagarika icuka kibi kirangwa hagati yivyo bihugu uko ari bibiri. Umuntu yumvirije ivyatangajwe n’umushikiranganji w’imigenderanire y’u Rwanda, vyarumvikana ko bafise icizere ko bashobora kumvikana, maze u Burundi bugafungura imipaka yabwo iruhuza n’igihugu c’u Rwanda bwafunze bwagiriza ico gihugu gufasha umuhari Red-Tabara wahisemwo kurwanya Reta y’uburundi ukoresheje ibirwanisho.
Eka no mw’ijambo ryiwe, kuri uyu w’Imana Paul Kagame umukuru w’igihugu c’u Rwanda, yarashimangiye ko hari ibiganiro hagati y’u Rwanda n’u Burundi bishobora gushikana kukubana neza. Naho atatomoye mumvugo yakoresheje, yavuze ko aba kolonije, u Rwanda, u Burundi na RDC babanje gushira hamwe ivyo bihugu vyose ngo kugira ngo birwanye u Rwanda. Yamara ngo biriko biraja ku ruhande bisobanuka. Aca amenyesha ko bariko baragenda bashaka kubana neza na bamwe muri abo babiri. Naho atemeje kumugaragaro ko ari uburundi, bamwe n’abandi bagendeye kumanama yari amaze iminsi aba hagati y’intumwa z’ivyo bihugu uko ari bibiri, baciye bamenya neza ko yariko aravuga uburundi
Wa wundi ati wotana n’umwana atagutuka akaguturira, kuri uwo w’Imana nyene, ari mw’ishengero rya Vision de Jésus-Christ, ahari hakoraniye abakirisu biryo shengeroyaradutse aragiriza igihugu c’u Rwanda kuba arico ntandaro y’amacakubiri ashingiye ku bwoko mu Burundi no muri Repubulika Iharanira Demokarasi ya Congo kuva mu mwaka w’i 1959 gushika mu myaka yi 1996.
Mu majambo yiwe yavuzeko, mu Burundi ngo bazaniwe ibibazo mu 1959, bivuye ku vyabaye mu Rwanda. Abakongomani na bo ngo vyabaye inyuma mu mwaka wa 1996, ngo bakaba bazaniwe ibibazo n’ibibaye mu Rwanda. Evariste Ndayishimiye akaba yavuze ko bidashoboka ko ivyo bihugu ngo vyokwama bihura nayo makuba aturutse mu Rwanda. Kubwiwe yavuze ko u Rwanda ngo rwokemura ibibazo vyarwo, ngo bareke kwinjira mu bibazo vy’abarundi. Ngo kuko mu Burundi ata Muhutu n’Umututsi, ngo bose ni Abarundi. Niba bo bayoborera ku bwoko, ivyo birabaraba.
Yamara naho umukuru w’igihugu c’uburundi yavuze ivyo, Abarundi n’amakungu ntanumwe atazi ko imvugo ya Ndayishimiye ari iyo gusamaza abarundi kuko abarundi barenga ibihumbi 500 vyabarundi b’amoko yose n’intara zose baganjwe, batahunze u Rwanda ahubwo ko bahungiye mu Rwanda akaba arirwo rubaha indaro.
Abarundi ntibayobewe ko intwaro yiwe irangwa n’amacakubiri yamoko, kuko ishingiye kubwoko bumwe bwabahutu babanje gukumira ubundi bwoko bwabatutsi, ivyo rero avuga abantu babibonamwo ububenshi bukomeye bwo gusamaza abarundi n’amakungu. Nayo kuba amenyesha ko mu burundi abarundi bose bari hamwe, sivyo nagatoya, ahubwo igihugu cahindutse icabari mu mugambwe uri kubutegetsi CNDD-FDD, muri kino gihe wumvirije abarundi bo hirya no hino, ntamurundi atifuza impinduka.
Yanditswe na Don de Dieu MBAZUMUTIMA.