Kunyuruza abantu mu gihugu c'uburundi birabandanya
Umutama bivurwa ko azwi ku mazina ya Dominiko Ndikumana avuka muri komine Gishubi mu ntara ya Gitega, ubu akaba yaba mu gisagara ca Bujumbura, biriko biravurwa ko yaraye aburiwe irengero kuva kuri uyu wagatandatu igenekerezo rya 22 Ntwarante 2025. Nkuko amakuru ariko araca ku mbuga ngurukanabumenyi avyerekana, bamwe mu bagenzi biwe baramutabariza ngo ntagende akagirire nkuko bimaze igihe biba mu gihugu gifise indongozi zivuga ko zashize Imana imbere. Ngo nimba hari ikimwagira, abo bamutabariza basaba ko yoshirwa imbere y'intahe agaheza akabibazwa.
Inyuruzwa ry'uwo mutama tubamenyeshe ko rije rikurukira irya Ciza Christophe nawe nyene avuka muri komine Gishubi mu ntara ya Gitega, akaba yaba muri zone ya Ngagara, komine Ntahangwa mu gisagara ca Bujumbura aho amakuru ava mu Ngagara amenyesha ko yaburiwe irengero kuva ku musi wa gatatu w'iyi ndwi turiko turasozera, igenekerezo rya 19 Ntwarante 2025 kuva isaha zitanu n'igice z'umurango. Gushika ubu, nawe nyene akaba atawuramenya ahari, mu Ngagara bagakeka ko yatwawe n'iperereza. Abanyengagara bakaba basaba nawe nyene ko yoshirwa imbere y' ubutungane mu gihe hoba hari ico yagirizwa.