Abarundi babandanya kunyuruzwa atacamira, mu kiringo gidashika indwi hamaze kunyuruzwa abanyagihugu bagera kuri 4. Ico bahuriyeko, ni uko batatu murabo bane bose bava mu ntara ya Gitega
Kuri iri genekerezo rya 24 Ntwarante 2025, Umugabo yitwa Mfitiye Emmanuel wo ku murwa mukuru wa politike i Gitega, yahoze ari umugenduzi w' indero mu ntara ya Gitega yahagaritswe n' iperereza ryo mu ntara ya Gitega rirongowe na Venant Ndayishimiye nk'igihe c'isaha zitanu z'umurango aca amanukanwa ubutarariye mu gisagara ca Bujumbura ku cicaro gikuru c'iperereza. Abamuzi baramutabariza ntagirigwe nabi. Umugwi CNIDH wama urindiriye abawitura gusa, bamwe n' abandi bawusaba gukurikirana amakuru ajanye n'agateka ka zina muntu kariko gahungabanywa, uyakorereko.
Uwo munyagihugu akaba agize kane anyurujwe mu kiringo kidashika indwi mubashoboye kumenywa n'uruganda rwa radio haguruka, hambavu y' umutama Dominiko Ndikumana avuka muri komine Gishubi mu ntara ya Gitega, ubu akaba yaba mu gisagara ca Bujumbura, yaburiwe irengero kuva ku mugoroba wo kuri uyu wa gatandatu igenekerezo rya 22 Ntwarante 2025. Nawe nyene akaba atabarizwa n'abamuzi.
Inyuruzwa ry'uwo mutama rikaba ryakurikiye iry'uwitwa Ciza Christophe nawe nyene avuka muri komine Gishubi mu ntara ya Gitega, akaba yaba muri zone ya Ngagara, komine Ntahangwa mu gisagara ca Bujumbura aho amakuru ava mu Ngagara amenyesha ko yaburiwe irengero kuva ku musi wa gatatu w' indwi iheze igenekerezo rya 19 Ntwarante 2025 kuva isaha zitanu n'igice z'umurango.
Uwugira kane akaba yitwa Bizimana Emmanuel w'imyaka 50, yaba muri karitiye Kiyange ya mbere, zone Buterere , komine Ntahangwa mu gisagara ca Bujumbura. Akaba yarasanzwe ari mu ndongozi z'umugambwe CNL ku rwego rwa zone Buterere mu ruhande rw'abayoboke ba Agathon Rwasa. Yanyurujwe mw'ijoro ry' uwa 22 Ntwarante 2025 nk'igihe c'isaha zibiri z'ijoro akuwe ku muhana iwe n'abapolisi bari kumwe n'imbonerakure zirimwo uwitwa Thérance, iyindi yitwa Benjamin hamwe n'iyo batazira Wakenya.
Abatari bake bavuga ko intwaro ya CNDD-FDD batakironka izina boyita naho yo yiyita mvyeyi na Nkozi ngo yashize Imana imbere. Abarundi ngo badahagurutse ngo bayisezerere, izobamara kamwe kamwe.
Vyanditswe na Don de Dieu MBAZUMUTIMA.