Haraye huguruwe i Kigali mu gihugu kibanyi c'urwanda, Fondation Maragarita Barankitse
Urwanko rwaratsinzwe! Maragarita Barankitse yatanguje ikigo Maison Shalom yaraye ahimbaje iyo ntsinzi nkuko tubisanga ku rubuga rwa X rw'ico kigo. Ku mugoroba w'uyu wa 24 Ntwarante 2025, umupfasoni Maragarita Barankitse, muri uko guhimbaza intsinzi ku rwanko, arakengurukira abanyarwanda ku mutima w'ubuvukanyi bakiranye abarundi bahunze muri rusangi hamwe n'ikigo Maison Shalom vy'umwihariko.
Ivyo birori bikaba vyabereye i Kigali mu gihugu c'Urwanda. Arashimira kandi umuryango wo mu gihugu ca Luxembourg wari uri muri ivyo birori, wifatanije n'ikigo Maison Shalom. Uwo mupfasoni akavuga ko ugufatana mu nda kwa Maison Shalom n'abafatanyabikorwa bayo gutuma baha urwaruka impfunguruzo zirwugururira imiryango ya kazoza keza.
Ni mu gihe umupfasoni Margarita Barankitse amaze kwugurura i Kigali ishure ryitirirwa umweranda Anna, Ecole Sainte Anne de Kigali, ritanga ubumenyi ku rwaruka rw' aba urw'impunzi n'urutari impunzi, abanyarwanda n'abandi banyamahanga baba mu rwanda bashima kwiga kuri iryo shure.
Umuyobozi w' ikigo Maison Shalom, umushingantahe Emery Emerimana nawe nyene yemeza ko ku mugoroba w'ejo hahise, ikigo Maison Shalom n'abafatanyabikorwa baco bariko bigina ubugenzi bubahuza. Ku bw' ubwo bugenzi, mu mwaka uheze wa 2024, bashoboye gushigikira abantu ibihumbi 7 bagizwe n'impumzi z'abarundi ndetse n'qbanyarwanda. Arashimira vy'umwihariko igihugu ca Luxembourg gifashe mu mugongo kuva kera ikigo Maison Shalom.
Umwe mu miryango yaturutse mu gihugu ca Luxembourg, umupfasoni Margarita Barankitse yashimiye, urongowe n'akarangamutima k' umuvyeyi Yitwa Nicolas wamukako hamwe n'umuryango wiwe, washoboye gushira mu ngiro ivyo wari wiyemeje, mugushikiriza muri ivyo birori ikigo Maison Shalom imfashanyo y'ibihumbi 40 vy'amafranga y'amanyabulaya mu ntumbero yo gushigikira ishami rya Fondation Maragarita Barankitse ryaraye ryuguruwe i Kigali mu gihugu kibanyi c'urwanda nkuko vyashikirijwe na Jean Claude Niyonkuru, arongoye urwego nshingwantwaro rwa Fondation Maragarita Barankitse. Navyo nyene tubisanga ku rubuga rwa X rw' ikigo Maison Shalom.
Inkuru yanditswe na Don de Dieu MBAZUMUTIMA.