Umuhari Red-Tabara urahakana wivuye inyuma ko ataco uhuriyeko n’igihugu c’u Rwanda, ndetse n’uwundi munyamahanga uwariwe wese. Bamenyesha ko urugamba rwabo rushigikiwe n'abarundi bonyene batahura impamvu uwo muhari wafashe ibirwanisho
Ari mu kiganiro yahaye iradiyo y' abongereza BBC Gahuza, cashizwe ku mbugahwaniro kuri uyu wa 25 Ntwatante 2025, umukuru w’igihugu Evariste Ndayishimiye yamenyesheje ko urwanda rutegura gutera uburundi ruciye muri congo rwihetse ku muhari Red-Tabara. Muri Red-tabara bakaba bavuze ko basubiribiye kubeshuza bivuye inyuma ko badafashwe mu mugongo n' urwanda canke uwundi uwari we wese wo hanze.
Iyo abahagarariye amasezerano ya Arusha aribo umuryango w' ibihugu vya Afrika y' ubusetuko, ubumwe bwa Afrika na ONU, bakora ico bategerezwa gukora, Red-Tabara ngo yari kuba yashize ibirwanisho hasi kuva kera. Uyu musi, ngo nta n' umwe murabo bahagarariye amasezerano ya Arusha arinanata ngw' atere igitsure umukuru w’igihugu Ndayishimiye, kugira ngo aganire n' abanyepolitike batavuga rumwe nawe hamwe n' abafashe ibirwanisho ndetse n'abadaharanira ivyicaro vya poritike.
Nkuko bibandanya bisigurwa na Red-Tabara, ngo igitanganje nuko muri ico kiganiro co kuri BBC Gahuza, Varisito Ndayishimiye yamenyesheje ko ashigikiye ibiganiro hagati ya reta ya Congo n' imigwi yitwaje ibirwanisho ariyo nzira yonyene ishobora guheza amatati. Red-Tabara muri iryo tangazo basohoye, bakaba bibaza igituma Ndayishimiye adashobora gushira mu bikorwa mu gihugu arongoye iyo mpanuro ariko atanga ku gihugu kibanyi. Red-Tabara irabaza kandi impamvu abahagarariye amasezerano ya Arusha batamubwiriza gufata iyo nzira kandi ku bibonwa bikaba bizwi na bose ko ariko aracana umuriro mu kararere.
Red-Tabara imenyesha kandi ko Ndayishimiye azi neza ko Red-Tabara idashigikiwe na gato n' urwanda aho rwo nyene rwubahutse rugatanga kuri reta y' uburundi abarwanyi 17 ba Red-Tabara ku wa 30 Mukakaro 2021, uyu musi abo barwanyi bakaba bafashwe bunyamaswa na reta y'uburundi. Red-Tabara ibandanya ibaza muri iryo tangazo ingene urwanda rwoshigikira Red-Tabara hama kandi rukaba mu biganiro biruhuza n' uburundi bigeze kure kugira ikibazo kiri hagati y' ivyo bihugu gitorerwe umuti. Red-Tabara ikaba ihumuriza Varisito Ndayishimiye ko iyo aza gushigikirwa n'abanyamahanga ntashigikiwe n' abanyagihugu, ntaba ari ahari ngo yirirwe aravuga ayamuhe agatondo umugoroba.
Kubwa Red-Tabara, ibona ko vyamaze kuba akamenyero kuri Varisito Ndayishimiye ko gucisha mu kanwa kiwe urwanda mu gihe cose yuguruye umunwa ngw' avuge, kikaba icitwazo yaronse co gusamaza abarundi n'amakungu ku mabi ariko akorera igihugu. Red-Tabara ikaba ihamagarira umuntu wese avyipfuza akurikirana ibiriko biraba kwishikira ahari ibirindiro vya Red-Tabara yironderere icemezo canke ikintu co kwerekana k'urwanda rwoba rufasha Red-Tabara.
Red-Tabara iheraheza iryo tangazo yipfuriza abarundi bose kudasamazwa n'uruyeri hamwe n'amajambo y'ububeshi ya y’umukuru w’igihugu Ndayishimiye, ahubwo baje hamwe basezerere intwaro ibateye imibabaro idashobora kwihanganirwa.
Inkuru yanditswe na Don de Dieu MBAZUMUTIMA.