Ibiciro ntarengwa bihejeje gusohorwa n’ubushikiranganji bw’ubudandaji ku bifungurwa 29 vya nkenerwa, ngo ni ingingo yapfuye gusohoka kugira umukuru w'igihugu ntamaramazwe ngw'avuga ibintu biherera mu majambo
Ubushikiranganji mu vyo bujejwe harimwo ubudandaji, kuri uyu wa 27 Ntwarante 2025, bwasohoye ibiciro ntarengwa ku bifungurwa 29 vya nkenerwa abarundi bafungura. Uturorero tumwe twovuga tw'ibiciro ku kilo, Umuceri wera urimirwa mu Burundi utegerezwa kutarenza amafaranga 5000 kandi ntuje musi y'amafranga 4000. Umuceri wera uva hanze nawo nturenza amafranga 7000 kandi ntuja musi y'amafranga 5000.
Ibiharage vyumye vy'umuhondo bita Jaune ntibirenza amafranga 6000 kandi ntibija musi y'ibihumbi 4500. Ibiharage vyumye bicangacanze vya Kirundo ntibirenza amafaranga 3500 kandi ntibija musi ya 2500. Ibigori vyera birimirwa mu Burundi ntibirenza amafranga 2100 kandi ntibija musi y' 1700. Ifu y'ibigori ikoboye ntirenza amafranga 4000 kandi ntija musi y'amafranga 3000. Ifu y'ibigori bidakoboye ntirenza amafranga 2500 kandi ntija musi y' 1900. Ifu y'imyumbati y'inyange ni 1700 kandi ntija musi y' 1500.
Ivyo biciro bisohotse inyuma y' amezi atatu kuva aho umukuru w'igihugu ahereye ubushikiranganji bw'ubudandanji iminsi 15 gusa ngo buzobe bwasohoye ibiciro ngo kuko umuntu wese asigaye ashinga ibiciro uko ashatse, hari mu mpera z'umwaka uheze ku wa 27 Kigarama 2024 kuri Lycée Scheppers Nyakabiga mu kiganiro n' abamenyeshamakuru hamwe n'abanyagihugu.
Bamwe mu bize ivy'ubutunzi batashimye kuduha amajwi bavuga ko ivyo biciro vyashinzwe bidatomoye kanatsinda ngo ntivyotomoka ngo kuko isoko ariryo mu bisanzwe ryishingira ibiciro bivanye n'uko umwimbu ungana hamwe n'ibitigiri vy'abaguzi.
Mu gihe rero urwo rwandiko rw'ubushikiranganji bw'ubudandaji butanatomara uko ibiciro bimeze intara ku ntara na rirya harimwo ibifungurwa bimwe usanga birwiye mu ntara zimwe ahandi ari bike, ivyo biciro vyashinzwe babifata nk'ibikanganyoni kuko atafatiro bifise. Akajagari k'ibiciro Niko kagiye kubandanya kibonekeza.
Abo twaganiriye babona kw'iyo ngingo ishinga ibiciro yapfuye gusohoka kugira umukuru w'igihugu ntamaramazwe ngw'avuga ibintu biherera mu majambo. Ico ngo kikanabonekera kuri ivyo biciro vyasohowe kuri bimwe, mu gihe umukuru w'igihugu yategetse gusohora ibiciro ku bintu vyose bidandazwa mu gihugu. Abandi banyagihugu bo bavuga ko intwaro ikomoka muri CNDD-FDD ataco ishoboye, nayo nyene ngo yovyemanga igaheza ikahava ngw'itagumye icengacenga abanyagihugu mugufata ingingo ataco zifasha.
Vyanditswe na Don de Dieu MBAZUMUTIMA.
Partager cet article !