Imigambwe PPD-Girijambo na MSD, irongowe na Alexis Sinduhije hamwe Na Leonidas Hatungimana, yashize hamwe amajwi ngo ikome akaruru itabaza ku bijanye n’ikintu kiriko kiraba mu Burundi co kwigisha amacakubir y'ubwoko, iyo migambwe igasaba ko abantu barikan
Nkuko bivurwa niyo migambwe, ngo haraheze amezi haba utunama mu kinyegero dutegurwa n’abakozi b’ubutegetsi bwa CNDD-FDD, utunama duhuza cane cane bamwe mu rwaruka rw’imbonerakure z’inkorabara z’uwo mugambwe. Aho ngo hagatangirwa inyigisho zibiba urwanko zitegura iyo miyabaga gukora ibara bitwaje ngo ni ugukingira igihugu umwansi bavuga ko ari u Rwanda ngo rushigikiwe n’abansi bo mu bwoko bw’abatutsi hamwe n’abahutu bita ibihemu.
Iyo migambwe ikaba imenyesha ko, mu kudondora abo biswe abansi n’abahemu, hakoreshwa amajambo abakura mu murwi wa kiremwamuntu kugira bize biborohere kubarigita akaryo kabonetse, atakubanza kwiyumvira ngo bibaze ikibazo na kimwe. Imvugo y’abo bategetsi b’abahutu bakamanikiwe mu macakubiri, ivuga ko abatutsi bama banyotewe kuja ku butegetsi, kandi ko bakora ibishoboka vyose ngo babuze abahutu gutwara. Ivyo bigaca binabafasha kunumya uwo wese arugoboroye anegura ubwo butegetsi.
Kubwiyo migambwe, ngo muri ico gihe abakozi b’ubwo butegetsi baba bariko bigisha ngo abatutsi ntibazokwigera bemera gutwarwa n’abahutu, ku rundi ruhande cane cane muri bamwe mu batutsi bahunze, hari imvugo ifatira mu kivunga ishaka kwerekana ko umengo abahutu bavukana umugera wo guhonya abatusi. Iyo mvugo ikorwa nkana kugira ihamagarire abatutsi kwirarira ngo hari ihonyabwoko ribarondera ririko rirategurwa.
MSD na PPD-Girijambo, ikaba ivuga ko iyo mvugo ngo ataho itandukaniye ni “agasema”. Ngo ku mbuga ngurukanabumenyi, haragwiriye ivyitwa ngo ni uguhana ijambo bikorwa n’abayita ngo n’abahinga mu vya politike kandi bashobora no kuyovya imitima y’abantu bari bafise ivyiyumviro vyiza. Abo bantu babiba urwanko nk’uko umengo kahise k’igihugu cacu ntaco kabigishije. Izo mvugo rero, zaba izikoreshwa n’abahutu bakamanikiwe mu macakubiri, zaba izikoreshwa n’abatutsi bamunzwe n’umugera w’amacakubiri, zihuriza hamwe mu kurondera inyendamuvano yotuma abarundi basubiranamwo bakicana bahorana ubwoko.
Bakavuga ko ivyo biriko biraba mu gihe amakungu n’akarere basa n’abitwararitse cane cane ibibera muri Repuburika iharanira intwaro rusangi ya Kongo bakibagira ko indyane zifatiye ku macakubiri mu karere k’ibiyaga binini vya Afrika ari uruhererekane. Cane cane uyu mugera w’amacakubiri uriko urabibwa n’ubutegetsi mu Burundi hamwe na bamwe mu batavugarumwe n’ubutegetsi basa n’abataye umutwe ushobora gukwega akarambaraye bigatuma n’utwo twigoro amakungu yariko akora muri Kongo tugwa mu mazi.
Ngo nico gituma imigambwe PPD-Girijambo na MSD igize urunani ngo irwanye yivuye inyuma uko kumungwa n’amacakubiri kuriko kurarwira. Iyo migambwe yo iguma ishira imbere ibiganiro kuko ari vyo vyotuma umuti uboneka. Iyo migambwe iribukije uruhara rw’ishirahamwe ry’ubumwe bwa Afrika UA, n’ishirahamwe ry’ibihugu vyo mu buseruko EAC nk’abahagarariye amasezerano ya Arusha yo kunywanisha abarundi. Nkako, ihonyanyangwa ryayo hamwe no kuyaraba nk’ico imbwa ihaze ni vyo bisasiye indava gusubira kwibonekeza kw’agashururu k’amacakubiri afatiye ku moko.
Mugusozera itangazo ryabo, Imigambwe PPD-Girijambo na MSD, irongowe na Alexis Sinduhije hamwe Na Leonidas Hatungimana, irasavye ishimitse ishirahamwe ry’ubumwe bw’Afrika UA n’ishirahamwe ry’ibihugu vyo mu buseruko EAC kugondoza prezida Evariste Ndayishimiye ngo yemere afate inzira y’ibiganiro kugira ibibazo vy’u Burundi bitore inyishu, kandi ibi bintu birihutirwa. N’ubu turasubiye kumenyesha ko ibibera mu Burundi bisaba ko abantu babikurikiranira hafi amazi atararenga inkombe.
Vyanditswe na Don de Dieu MBAZUMUTIMA.