Umwuga wo kumenyeshamakuru mu Burundi usigaye uburabuzwa buri musi kuburyo nabawukora basigaye batonda kukazi batazi ko bataha amahoro
Nkuko vyari vyamenyekanye kumusi wejo, biciye mw'itangazo ryari ryasohowe n‘Ikinyamakuru Jimbere Magazine kuri uyu wa 19 Ruhuhuma 2026, ico kinyamakuru Jimbere Magazine, cari camenyesheje ko umumenyeshamakuru Olivier Manirambona na Aline Niyonizeye afata amasanamu, bahagaritswe bagapfungirwa mu gasho ka zone Ngagagara, muri komine Ntahangwa intara ya Bujumbura. Jimbere Magazine ikaba yari yamenyesheje ko abo bakozi babiri 2 bafashwe mu gihe bari gukurikirana ishirwa mu ngiro ry'urubanza rw'itongo ryariko riraba hagati ya Siméon Ngenzebuhoro na Suzanne Manirakiza rwari rumaze imyaka 21, itongo riri muri Mutanga Nord.
Muri iryo tangazo ryico kinyamakuru, bari bamenyesheje ko abo bakozi babiri 2 basambishijwe na parake ya Ntahangwa hakongera hagafatwa n'icegeranyo, ngo hanyuma haca hafatwa ingingo kubapfunga babapfunganye na Siméon Ngenzebuhoro, umwe mubari muri ayo matati yari hagati ya be na Suzanne Manirakiza rwari rumaze imyaka 21, itongo riherereye muri Mutanga Nord. Bikaba vyavurwa ko babapfunze mu kurindira urubanza rw'ikibiriraho rwari rutegekanijwe ejo nyene ku wa 19 Ruhuhuma, ariko urubanza rutabaye rukiba, rwari rwungururijwe uyu musi itariki 20 Ruhuhuma 2026.
Ikinyamakuru Jimbere Magazine, kikaba cari cagumye gisaba ko abo bakozi babiri 2, Olivier Manirambona na Aline Niyonizeye, ko borekurwa ngo kuko ataco bazira kandi ata n‘amategeko y'umwuga barenze.
Kuri uyu wa 20 Ruhuhuma 2026, abo bamenyeshamakuru bari bapfunzwe barekuwe
Nkuko vyabonetse mu ngingo y'umushikirizamanza mukuru akukira sentare isubiramwo imanza ya Ntahangwa, Eraste Ndayiragije, abo bakozi babiri 2, Olivier Manirambona hamwe na Aline Niyonizeye barekuwe vy'agateganyo kuri uyu wa 20 Ruhuhuma 2026. Bakaba barekuwe ariko mu gihe bari biteze kurenguka mu rubanza rw'ikibiriraho rwari rwasivye kuri uyu wa 19 Ruhuhuma.
Nkuko bibandanya bisigurwa nuyo mushikirizamanza mukuru akukira sentare nkuru isubiramwo imanza ya Ntahangwa, Eraste Ndayiragije, amenyesha ko hafashwe ingingo ngo yo kuba bararekuwe vy'agateganyo, ngo kuko babonye ko umwidegemvyo wabo ariwo wihutirwa be no kubasubiza bimwe mu bikoresho vyabo vyakazi.
Ariko ngaha tubibutse ko abo bamenyeshamakuru bari bafashwe mu gihe bari gukurikirana inkuru ijanye n'ishirwa mu ngiro ry'urubanza rw'itongo ryo kuri Mutanga Nord mu gisagara ca Bujumbura, baca bafatwa bagirizwa icaha co kugarariza (rébellion). Mugihe mw’ishirahamwe ALUCHOTO ryishinze kurwanya ubushomeri n’ihohoterwa rya kiremwamuntu, bamenyesha ko hasohotse ingingo ivuga ko umuntu afunga uwundi ku karenganyo nawe aca yitwarirwa. Bakongera bagasaba ko abacamanza n’aba OPJ bafungira umuntu ubusa, bohanwa bakongera bagakurwa mu mabanga yabo, bamwe mu banyagihugu bavuga ko batazi ko kumbure uyo mushikirizamanza mukuru akukira sentare nkuru isubiramwo imanza ya Ntahangwa, Eraste Ndayiragije, yoba ashobora kuzokwirikiranwa agatako agapfungwa.
Nkuko bibandanya bisigurwa na Vianney Ndayisenga, arongoye ishirahamwe ALUCHOTO yagize ati : nduguruye twa mugina « Hariho aba OPJ bamwe bamwe bagize umwuga gufungira abantu ubusa, uwubahaye amafaranga ibihumbi 50 bagaca babika mu gasho. Hari n'abandi ba OPJ basigaye bafunga abantu imisi irenga 10, kandi itegeko ritomora ko umuntu adashobora gupfungwa ikiringo kirenza imisi 7 mu matohoza y'ibanze, kiretse ahawe uburenganzira n'umushikirizamanza. Aba OPJ nkabo nibabe baca bacirirwa urubanza rw’ikibiriraho, bahanwe »
Ico bikoze, ni uko biriko biribonekeza ko umwuga wo kumenyeshamakuru mu Burundi usigaye uburabuzwa buri musi, kuburyo nabawukora basigaye batonda kukazi batazi ko bataha amahoro. Ikindi naco ni uko ubutungane bubandanya kugaragara ko mu burundi bugoyagoya kandi ko butakibaho.
Vyanditswe na Don de Dieu MBAZUMUTIMA.